અંધારા ઉલેચીને
       હે પ્રભુ  અજવાળાં ફેલાવો, ફેલાવો
       મનની અટારીએથી માયા મૂકાવી
        હે પ્રભુ મહેકાવો , મહેકાવો
        દિલનાં દુખડા દૂર કરી
        હે પ્રભુ દર્દથી સજાવો, સજાવો
        વાણીની સરિતા દ્વારા
         હે પ્રભુ વહાલને વરસાવો, વરસાવો
         કર્મની કુંપળોને સત્કર્મથી
          હે પ્રભુ સોહાવો, સોહાવો
          વર્તન સુંદર ને વિનયથી
          હે પ્રભુ શણગારો, શણગારો
          નાનીશી પ્રેમની દીવી પ્રગટાવી
          હે પ્રભુ અજવાળાં ફેલાવો, ફેલાવો     

 જીંદગીમાં પાત્ર કાચનું મળે કે સુવર્ણનું તેનો અફસોસ ન કરવો.
   તમારું પાત્ર પોકળ સાબિત ન થાય તેનો હરહંમેશ ખ્યાલ રહે
     તે  અત્યંત આવશ્યક છે.
     કાચનું પાત્ર ફૂટી જવાનો ભય સતાવશે. સુવર્ણનું પાત્ર
     ચોરાઈ જવાનો ડર શાંતિની નિંદ્રા પણ નહીં લેવા દે. જો
     તમે પોકળ યા તકલાદી નહીં હો તો આ જગે તમે સફળ
     પૂરવાર થશો.જીવનમાં સંયમ, વૃત્તિઓ પર લગામ અને
     જિહ્યાગ્રે સરસ્વતિનો વાસ જારી રાખશો.
     પાત્રતા કેળવવામાં અને સાચવી રાખવામાં તે ખૂબજ
    મહત્વનો ભાગ ભજવે છે.સફળતા પ્રાપ્ત કરવાની ચાવી
    આપણાં જ હાથમાં છે. સફળતા તમારા ચરણ ચૂમશે.
    ઈશ્વરને દોષ દેવો, સંજોગોનું આવલંબન લઈ હાર
    કબૂલવી એ  વિરલાનાં કામ નથી. આપણે પોતે શુભ
    કરવાને શક્તિમાન છીએ.જીવનમાં આંધિ યા શાંતિ
    આપણાપર આધારિત છે.

   તું હોય તોયે શું
         ન હોય તોયે શું
       તું આવે તોયે શું
          ન આવે તોયે શું
        તું પાસ તોયે શું
           કે દૂર તોયે શું
     

    તું હસાવે તોયે શું
            કે રુલાવે તોયે શું
          તું પ્રત્યક્ષ તોયે શું
             યા પરોક્ષ તોયે શું
          તું દિલમાં હંમેશ
             મીઠી યાદોંમાં હરહંમેશ

આવો માને કરીએ પ્રણામ
  મા તું ત્યાગનું પ્રમાણ
  અંતરે તારે પ્રેમ નું ગાન
  હરદમ દે આશિષનાં દાન
    આવો માને કરીએ પ્રણામ
  મા તેં ઘસી તારી આ કાયા
  ન રાખ્યા સ્વાર્થ ને કદી માયા
  બાળકોના સુખે વધે તારી શાન
    આવો માને કરીએ પ્રણામ
  મા તને શ્રીજીનો સહારો
  શ્રીવલ્લભ ઝાલે હાથ તારો

 મુખ કમળે અષ્ટાક્ષરનું ગાન
      આવો માને કરીએ પ્રણામ
   શ્રીજી સુણતું વિનતી ‘પમી’ની
   માવડીની છે સેવામાં લગની
   સુમિરન કરતાં છૂટે તેનાં પ્રાણ
      આવો માને કરીએ પ્રણામ   

 તું આવી છે શરમાતી આંગણ મહીં
   તારા કુમકુમ પગલે લાવી
     ઉમંગ આનંદ અંજલી ભરી
   શ્રીજી પ્રભુની ક્રૂપા થઈ તું ઘર દ્વારે આવી ઉભી
   પાપાજીનાં આશિષ વરસે સ્નેહનો સાગર નિર્મળ બની
   રાજનનાં જીવનને તારો સ્પર્શ આહ્લાદક આવી મળ્યો
   નમ્રતા રૂપીનનાં દિલમાં આજે સ્નેહનો સાગર ઉમટી રહ્યો
   અવિ અનુજ આશયને તારા મીઠા મધુરાં વેણ મળ્યાં
   મમ્માનાં હ્ર્દયમાં આજે સ્નેહનો સાગર છલકી રહ્યો
   મોજા પાણી છે અભિન્ન દૂધ સાકર જેમ ભળી ગયાં
   ‘અવિપમી’નાં સંસારમાં આજે સ્નેહનો સાગર સ્થિર થયો 

જીવનમાં બહાર આવી જેનાં પગરવને સુણી
જેના આગમનને કારણ દિલ ધબકારો ચૂક્યું
આ એજ વ્યક્તિની યાદે હું સૂનમૂન બેઠી છું
સુંદર સંસ્કાર અર્પી બાળકોમાં ગુંથાઈ
માયા મમતાનાં બંધન સાથી સંગે સોહાવી
આ એજ વ્યક્તિની યાદે હું ગુમસુમ બેઠી છું
ફૂલવાડી સિંચિત થઈ કળફૂલથી ઉભરાઈ
માળી વિણ બગિયાંની હું મહેક માણું છું
આ એજ વ્યક્તિની યાદે હું સ્વપનાં જોતી છું
વણ માગ્યે જીવનમાં લહર આનંદની ઉઠી
પ્રભુ તારી દયાની હું કરૂણાને યાચું છું
આ એજ વ્યક્તિની યાદે જીવનને પાવન માનું છું

  દૂર દૂર દૂર કહીં તું મુજને બોલાવ
                        તું મુજને બોલાવ
       તારી સમીપે આવું હું તું જગને ભૂલાવ
                            તું જગને ભૂલાવ
       જો તારો મારો સંગ હોય અનેરો એ આનંદ હોય
       મોજાંની એ મસ્તીમાં  તું મુજને ભિંજાવ
                            તું મુજને ભિંજાવ
       ઓરો આવ તું આઘો જા પગની પાની પલાળતો જા
       ઠંડી હવાની સરગમમાં દિલના તાર તું છેડતો જા
       જો રંગાઈ તારા રંગે દૂજોના લાગે અંગે
       મોજાની એ મસ્તીમાં તું મુજને ભિંજાવ
                            તું મુજને ભિંજાવ
        તારી અફાટ જળરાશીમાં મુજને તું સમાવતો જા
        તારી નિકટતા પામીને તુજમાં લીન કરતો જા
         જો સમાણી તારા ઉરમાં જાગી હું ભર નિંદરમાં
         મોજાની એ મસ્તીમાં તું મુજને ભિંજાવ
                              તું મુજને ભિંજાવ

 ઓરા આવો તો વહાલાં નિરખું શ્રીનાથજી
   આંખલડી મારી પાવન થાયે શ્રીનાથજી
   તમ સાથે જોડી પ્રિતડી શ્રીનાથજી
   હૈયું હાથ રહ્યું જાય ના શ્રીનાથજી  ઓરા આવો—
  કાનમાં કહેવી તમને વાતડી શ્રીનાથજી
   મંગલ આશિષ વરસાવો શ્રીનાથજી  ઓરા આવો—-
  તમ ક્રૂપાએ જીવનમાં ભાત છે શ્રીનાથજી
   ભક્તોનો સંગ રૂડો પામી શ્રીનાથજી  ઓરા આવો—-
  બંસીના નાદે થઈ ઘેલી શ્રીનાથજી
   રાસલીલામાં ભાન ભૂલી શ્રીનાથજી   ઓરા આવો—
  હ્રદયનાં દ્વાર ખૂલ્લાં મૂક્યા શ્રીનાથજી
   આગમનની ઘડીઓ ગણાતી શ્રીનાજી  ઓરા આવો—
  જીવન પથપર સંગ તારો શ્રીનાથજી
   અંત સમયે સાથ સાધજો શ્રીનાથજી   ઓરા આવો–