મિત્રની  આશ્ચર્ય ભરેલી “૬૦” મી વર્ષગાંઠમાં હાજરી

આપી  ત્યારે આનંદનો અવધિ ઉછળી રહ્યો.  તાજા ‘નાના’

બન્યા હતા. નવી નવેલી ‘પુત્રવધુ’ આંગણે આવી હતી.

      અંતરના ભાવ ઠલવાયા.

ખૂબસૂરત વ્યક્તિ

મુખ પર ઉભરાતું સ્મિત

વાચાળ અને વ્યવસ્થિત

ઉમર ભલેને “સાઠ”

દિલ છે જેનું સાફ

સ્ફૂર્તિ સભર થનગનતી જવાની

“શૈલા” સંગે માણે જીંદગાની

કુટુંબમા મોટા

દિકરીએ બનાવ્યા ‘નાના’

ઘરમા ચહલપહલ

આંગણમા રણકે ‘કંગન’

શબ્દ દ્વારા અભિવ્યક્તિ

લેખનીની અશક્તિ

સદા હસો હસાવતા રહો

જીવનમા ખુશી રેલાવતા રહો

સત્કાર્ય દ્વારા જીવન દિપાવતા રહો

નાના મોટા અબાલ વૃધ્ધ

શાંતિ પૂર્વક પોઢ્યા હતા

શું વાંક હતો શું ગુન્હો હતો

પ્રશ્ન હવામા ઘુમતો હતો

ત્રણ વર્ષથી ૭૩ વર્ષના

તાપ બરફ ખમતા હતા

ન ફરિયાદ ન ચિત્કાર

દિલમા પ્રસર્યો હાહાકાર

નિર્દોષો હોમાયા હતા 

પેન્ટેગોનના પ્રાંગણમા

અંતરથી શાંતિ પ્રાર્થી

અશ્રુની અંજલી અર્પી

પ્રતિક ત્યાં થમી ગયા

ખળખળ પાણી વહી રહ્યાં

૯/૧૧

તાલ નિકળ્યો શોધવા સૂર

હૈયામાંહી જાણે ઉમટ્યું પૂર

ઢોલક મંજીરાની સંગે સોહે

કંઠની મિઠાસ તેમા વહે

સૂર તાલ મળવા કઠીન

વાજિંત્રોના મિજાજ રંગીન

તાલ બધ્ધ જો નિકળે સૂર

વાતાવરણ બને ચકચૂર

સૂર અને તાલનું મિલન

સંગીત સભર બને જીવન

સૂર નિરંતર હૈયામાહી વસે

તાલથી તાલ મળીને હસે

            કૃષ્ણ જન્મ એટલે આનંદ મંગલનું પર્વ.

            સહુ મિત્રોને ખૂબ ખૂબ વધાઈ. તો ચાલો

           કૃષ્ણ ભગવાન ગીતામા કહે છે તેને થોડું

           યાદ કરી તેના પર વિચારીએ.

૧.       તારો અધિકાર માત્ર કર્મ પર છે.

૨.        માત્ર ફળની આશાથી કોઈ પણ કાર્ય ન કરવું.

૩.         યોગઃ કર્મેષુ કૌશલં.

૪.          યોગઃ સમત્વં ઉચ્યતે.

૫.           સ્થિતપજ્ઞતાની જીવનમા આવશ્યકતા.

૬.            અત્મા બળતો નથી, પલળતો નથી, વાયુ

                 તેને ઉડાડી શકતો નથી.

૭.           માનવનું શરિર ત્યજવું એટલે જૂના વસ્ત્રો

                 ઉતારી નવા ધારણ કરવા.

 ૮.             મોહથી બુધ્ધિનો નાશ થાય છે.

૯.               મૃત્યુ અનિવાર્ય છે.

૧૦.             મોક્ષના ચાર રસ્તા છે.

                   * કર્મ યોગ

                   * રાજ યોગ

                   * જ્ઞાન યોગ

                  * ભક્તિ યોગ

    ઓગસ્ટ ૨૬, ૨૦૧૦ અમારા પૌત્ર  “અવિની ૧૪”મી વર્ષગાંઠ નિમિત્તે

શુભ આશિષ.   આજે પણ તે ધન્ય ઘડી યાદ આવે છે ને સારા દિલમાં

રોમાંચનો અનુભવ થાય છે.

    અ.સૌ. નમ્રતા અને ચિ. રૂપિનના આંગણાનું પ્યારનું પુષ્પ. ‘અવિને

અભિનંદન અને ખૂબ ખૂબ પ્યાર.   સંસ્કાર તેમેજ સુંદર પ્રગતિ દ્વારા

અવિ આજે નવા વર્ષમા પગરણ માંડી રહ્યો છે તે બદલ પ્રભુનો

આભાર.

    જન્મદિવસની શુભકામના અને અંતરના આશિર્વાદ. 

Lots of love G’mom 

પેલા વાયરાનો માયના તોર

સોંપ્યો કોના  હાથમા દોર

મારું હૈયું હાલમ ડોલ

સોંપ્યો કોના હાથમા દોર

શ્વાસની આવન જાવન લયબધ્ધ

ઉરના તાલનો કલશોર

સોંપ્યો કોના હાથમા દોર

ગ્રિષ્મની ધોમ ધખતી ધરા

ક્યારે સાંજની થઈ ભોર

સોંપ્યો કોના હાથમા દોર

સુનહરી યાદોંની બારાત નિકળી

નાચ્યો મનડા કેરો મોર

સોંપ્યો કોના હાથમા દોર

ઉછળતા મોજા મિલનની આશે

ભીંજી મારી સાળુડાની કોર

સોંપ્યો કોના હાથમા દોર

જીવનમરણની ઘેલી ઘટમાળમા

આભે છાઈ ઘટા ઘનઘોર

સોંપ્યો કોના હાથમા દોર

હાર અને જીત એ  તો છે જીવનની રીત

જિતેલી બાજી હારતા વાર નથી લાગતી

અભિમાનમા ચકચૂર એ જીવનની રીત

યાદ રહે ફુગ્ગાને ફૂટતા વાર નથી લાગતી

સમતા ધારણ કર સુંદર જીવનની રીત

મેળવેલું ગુમાવતા વાર નથી લાગતી

મધદરિયે સાહસિક તરે જીવનની રીત

કિનારે આવી ડૂબતા વાર નથી લાગતી

આશાઓના મહેલ ચણવા જીવનની રીત

જગમા નિરાશા સાંપડતા વાર નથી લાગતી

હારજીતમા સ્થિતપ્રજ્ઞતા જીવનની રીત

ગીતા વાંચી ભૂલતા વાર નથી લાગતી

   દીપક બુઝાઇ ગયો

   તેલ ખૂટી ગયું

દીપક જલતો ત્યારે

રોશની હતી ઝળાઝળાં

ભલે આજે દીપક

ચક્ષુથી ઓઝલ થયો

સુગંધ તેની ફેલાવીને

પ્યાર વરસાવી રહ્યો

કોડિયુ રડી ઉઠયું

વાટ નિરખી રહી

શબ્દનો પડઘો પડ્યો

યાદોમાં તું દીપક

રોશનીમા તું દીપક

પન્નાનો તું દીપક

દિલોમા વસ્યો દીપક

શ્રીજીની સેવામા દીપક

સહુનો લાડીલો દીપક

      દીપક નાની ઉંમરમા શ્રીજીને ચરણે.

તેને ભાવભરી શ્રધ્ધાંજલી.

                   મુસાફરો અનેક મળ્યા આ જીવનની સફરમા

                   મુકામ સુધી સાથ નિભાવે તે સાથી શોધું છું

                   સમઝણની વાતો સુણી સુણી આ કાન થાક્યા

                   સમજે અને સૂર મિલાવે તે સાથ શોધું છું

                 નાની નાની ઘટનાઓથી સભર આ જીવનમા

                  મનના તાલ જાળવી વિણાનો ઝંકાર શોધું છું

                 નિઃસ્વાર્થથી જીવન જીવી સરળ વહે આ જીવન

                   અંતિમ ક્ષણો પર તારે શરણે વિરામ શોધું છું

 સૌંદર્ય કેમ પમાય સૌંદર્ય બનવું પડે

શાંતિ કેમ જળવાય શાંત બનવું પડે

તન મન વાણીમા સમતા જાળવવી પડે

વિચારોમા ચંચળતાને સંભાળવી પડે

શબ્દોની માયામા સરળતા લાવવી પડે

વાણીના અંદાઝને  વિવેકથી નાથવી પડે 

રંગીન ચશ્મા ઉતારી નરી આંખે જોવું પડે

સ્વાર્થ ત્યજી નિઃસ્વાર્થી બનવું પડે

જીવનમા જીભ પર સંયમ રાખવો પડે

બીજાના દોષો જોવાની આદત ત્યજવી પડે

બાળકોને સંસ્કાર સારા પ્રેમે આપવા પડે

માતાપિતાને કાજ દિલે આદર રખવો પડે

હમેશા પ્યાર પામવા મહોબ્બત કરવી પડે

ફુલોની સુગંધ માણવા કાંટાને સહેવા પડે

સુંદર જીવન  સરજનહારનો ગણ માનવો પડે