Archive for July, 2010
ખરખરો કરવા આવજો
July 19th, 2010મસ્ત મન
July 18th, 2010મન મસ્ત હોય ત્યારે શું બોલે
તે ઉંડા ભેદ પેલા મનના ખોલે
હીરા જેવી વાણી ને પામ્યો
વારંવાર વાંકુ શાકાજે બોલે
મન મસ્ત હોય ત્યારે શું બોલે
સમય ન જોયો સ્થળ ના જોયું
મીઠી વાણી કાં નવ બોલે
સહુને રીઝવે પ્રેમને પામે
મનને ત્રાજવે શું તોલે
મન મસ્ત હોય ત્યારે શું બોલે
આત્મા અંતર માંહી બિરાજે
બહાર ભટકી શું ખોળે
મન મસ્ત હોય ત્યારે શું બોલે
સંયમનું આભૂષણ ધારી
સારા જગમા જો વિચરે
સહુને પ્યારો ને બને દુલારો
મન મસ્ત બની મીઠું બોલે
સંગીત સુણો
July 16th, 2010
જીદગી દરરોજ સારા યા નરસા બનાવોથી ભરપૂર છે.
જેમ સારાને માણો તેમ નરસાને નિહાળો. સરી જશે નિશાન પણ
નહી છોડે. જીવનનું લય બધ્ધ સંગીત સુણો.
બાળકોની મધુર મુસ્કાન, વાદળોની દોડપકડ અને પક્ષીઓનો
કલરવ. જીવનમા આનંદનો ધોધ વહેશે. એક જીવન જીવવાનું છે.
હસી ખુશીથી જીવો. નાની નાની અણગમતી વાતોને ધુંઆની જેમ
ઉડાઓ.
સુંદર આભને નિરખો. રોજ નવી ઉમંગ અને આશા લઈને આવે છે.
સમાનતા
July 15th, 2010સવારનો ઠંડો પહોર હતો. મંદ મંદ શિતલ વાયુ સારા બદનમા સ્ફુર્તિ
અર્પિ રહ્યો હતા. સૂરજના કોમલ કિરણો ધરતીને ચૂમી તેની સંગે ગેલ કરતા
હતા. આવા સમયે પથારીમા રહી પડખાં ઘસવાનું જાનકીને કદી ન ગમતું.
જેવી આંખ ખૂલે એટલે પ્રાતઃકર્મ પતાવી બગીચામા ચાલવા જતી.
જો ધોધમાર વરસાદ હોય કે કાતિલ ઠંડી તો તે ન જતી. ખુલ્લી હવાની લિજ્જત
માણવી તેને ખૂબ ગમતી. આ તો તેનો રોજનો અતૂટ કાર્યક્રમ તેમા મિનીમેખ ન
થાય.
આજે પણ જેવી તે બાગમા પ્રવેશી તેવી જ તેના પગ આગળ કાંઇ અથડાયું.
નજર નીચી ઢાળીને જોયું તો સૂકાયેલી ઝાડની ડાળખી. જાનકી ક્ષણવાર માટે ચોંકી ગઈ.
તેણે પ્રેમથી તે ડાળીને ઉંચકી અને નિરખી રહી.
ચાલવાને બદલે એક બાંકડા પર તેણે સ્થાન ગ્રહણ કર્યું. જાનકી જાણે સ્વપનામાં
સરી પડી. તેની નજર સમક્ષ લીલા પાનથી શોભતી ,વાયરાને તાલે ઝુમતી ડાળી જણાઈ.
કેવી મદમસ્ત ઝુલી રહી હતી. વાયુ સંગે લહેરાતા કુદરતની કરામતનું પાન કરાવી સહુનું
મન મોહી રહી હતી.
અને આજે તેના હાલ પર રડાઈ જવાય. ઠુંઠા જેવી છતાંય જો ઠંડી હોય તો ગરમાવો
આપવા શક્તિમાન.
જ્યારે પોતે ૬૦ વટાવી ચૂકી હતી. ઠુંઠા જેવી તો નહી પણ નિસ્તેજ જરૂર લાગતી.
આજે તેનો પતિ હયાત ન હતો તેથી તે એકલવાયી જીવન વિતાવી રહી હતી. દિકરી પરણીને
લંડન રહેતી હતી. દિકરો ભણીગણી, પરણીને પત્ની સાથે ચમન કરતો. બે બળકો તેના નાના હતા.
દિકરીના તો વર્ષ પહેલા લગ્ન લીધા હતા તેથી હજુ સંતાન સુખ પ્રાપ્ત થયું ન હતું.
જાનકી વિચારી રહી હતી અરે આ ડાળખી તો વૃક્ષથી છૂટી પડી , બેજાન થઈ છતાં
પોતાની કાયા જલાવી ઠંડીથી રક્ષણ આપી શકવા સક્ષમ છે.
જાનકી ભૂતકાળમા સરી પડી. ભર જુવાનીમા તે પણ કેવી ઝુમતી ગાતી હતી. તેનો પતિ
જાદવ તેને પૂછ્યા વગર પાણી પણ ન પીતો. શામાટે તે તેને ન ચાહે, જાદવના કુટુંબીજનોને
ખૂબ પ્યાર આપી વળતો પ્રેમ પામી હતી. હર્યોભર્યો તેનો સંસાર અજાણ્યાને પણ ઈર્ષ્યા આવે
તેવો હતો. સુંદર બે બાળકો અને જાદવની મા.
પોતાના માબાપ ગામમા જ હતા. મા ની શિખામણ તણે માની અને જાદવને પ્રેમે
વશ કર્યો. સંસ્કારી મા દિકરીના ઘરમા જરા પણ ચંચુપાત કરતી નહી. દૂરથી દિકરીનો સંસાર
જોઈ રાજી થતી.
“હું હરિયાળા સંસારથી દૂર થઈ. આંખે મોતિયો ને ચાલમા ઠુમકા શરુ થયા. જ્યારે સંપૂર્ણ
અલગ થઈશ ત્યારે તો મારી મુઠ્ઠીભર રાખ બનશે.” મારા કરતા આ ઝાડની ડાળી નસિબદાર નહી
વિયોગે સૂકાઈ છતાંય કામમા આવશે.
બેજાન હોવા છતાય ઉપયોગી.મારામા જાન હોવા છતા ભારરૂપ. જો કે એ તો મનની
માન્યતા બાકી ,જાનકી જીવન દીપી ઉઠે તેમ જીવતી હતી.
સમાનતા હોવા છતાં તે મહાન છે, જાનકીના અંતરમા ડાળી પ્રત્યે ઉમળકો આવ્યો અને તે
દિવસે ચાલવાનું મુલતવી રાખી ડાળીને જતનથી પકડી ઘર તરફ પ્રયાણ કર્યું.
પ્રેમે પસવાર્યો રે લોલ
July 14th, 2010
પ્યારો છે ચાંદ શિતળ ચાંદનીરે લોલ
એથી પ્યારો છે મારો તાત રે
પિતાએ પ્રેમે પસવાર્યો રે લોલ
આંગળી ઝાલી ચાલતા શીખવ્યું રે લોલ
મૌનમા વરસે જેનો પ્યાર રે
પિતાએ પ્રેમે પસવાર્યો રે લોલ
વહાલે પંપાળી મુજને થાબડે રે લોલ
ઉછાળે ગગને આંબવા ચાંદ રે
પિતાએ પ્રેમે પસવાર્યો રે લોલ
વાણી ભલેને તેની આકરી રે લોલ
હર શબ્દે વહે પ્રેમનો પ્રવાહ રે
પિતાએ પ્રેમે પસવાર્યો રે લોલ
આબેહૂબ પ્રતિકૃતિ તાતની રે લોલ
શીર તેનુ ગર્વે ઉંચકાય રે
પિતાએ પ્રેમે પસવાર્યો રે લોલ
વિશ્વાસને ધૈર્ય જેણે શિખવ્યા રે લોલ
આદરથી મસ્તક જેને નમે રે
પિતાએ પ્રેમે પસવાર્યો રે લોલ
સંયમનો ઘુઘવે પેલો સગર રે લોલ
અસ્તિત્વ મારું જેને શીર રે
પિતાએ પ્રેમે પસવાર્યો રે લોલ
જીવનભર ઋણ જેનું પામ્યો રે લોલ
તાત તારો અગણિત ઉપકાર રે
પિતાએ પ્રેમે પસવાર્યો રે લોલ
મીઠા મધુને મીઠા મેહુલારે લોલ
એથી મીઠી છે મારી માત રે
જનનીની જોડ સખી નહી જડે રે લોલ
જઠરાગ્નિ
July 13th, 2010મહેફિલ જામી હતી. ચારે બાજુ હાસ્યની છોળો રેલાઈ રહી હતી.
શરાબની બાટલીઓનો ટંકારવ કર્ણપ્રિય લાગતો હત. સંગીતના સૂર પર
સહેલાણીઓ ઠુમકા મારી રહી હતી. ધરતી પર જો સ્વર્ગ હોય તો અંહીજ છે
એમ ભાસતુ હતું.
આદરણિય મિનિસ્ટર સાહેબ હજુ પધાર્યા ન હતા તેથી મહેફિલ થોડી
કાબૂ બહાર હતી. છતાંય સંયમની મર્યાદા જાળવી સહુ પોતાનું વર્તન કરતા
હતા. કેમ ન કરે સમાજનો ઉપલો વર્ગ મળ્યો હતો.
સમાજનો એ વર્ગ , જેના ખિસામા પૈસાનું જોર હોય છે તેઓ પોતાની
જાતનૅ ખૂબ હોશિયાર સમજે છે. અભિમાન તો તેમને નાકને ટેરવે બેઠેલું હોય
હું પણું તેમના વાણી અને વર્તન દ્વારા છતું હોય. તેમના અવાજનો રણકો શંખ
નાદ કરતા પણ બુલંદ હોય.
એટલામા મિનિસ્ટર પધાર્યાની ઘોષણા થઈ. સોય પડે તો પણ સંભળાય
તેવી શાંતિનું સામ્રાજ્ય ચારેકોર છવાઈ ગયું. ટુંકૂને ટચ ભાષણ આપી સહુને
આવકારી મિનિસ્ટર બેસી ગયા. બે પાંચ નાનામોટા ભાષણ થયા.
મિનિસ્ટર સાહેબને બીજા બે અગત્યના રોકાણ હતા તેથી દરેક જણ પોત
પોતાની જગ્યા પર ગોઠવાયા અને કતારબંધ ખાવાનું પિરસવાવાળા નિકળી
પડ્યા. જેની સોડમ આટલી સુંદર હોય તે અન્ન કેટલું ભવ્ય અને સ્વાદિષ્ટ હશે
તેની કલ્પના જ કરવી રહી.
ભોજન બધુ પરોસાઈ ગયું. સમૂહમા પ્રાર્થના કરી દરેકે જમવાની શરૂઆત
કરી. હજુ તો અડધું પણ નહી ખવાયું હોય ત્યાં અચાનક “આગ્ની ભય સૂચક” ઘંટડી
વાગી સહુથી પહેલા મિનિસ્ટર એંઠા હાથે દરવાજા તરફ દોડ્યા.
મિનિસ્ટર જાય એટલે હાજર રહેલી કોઈ પણ વ્યક્તિ ક્ર્વી રીતે ભોજનનો
રસાસ્વાદ માણી શકે. દરેક જણ મિનિસ્ટરને અનુસર્યા. અને મોટા શણગારેલા
ભોજનના કમરામાંથી બહાર નિકળી વરંડામા જમા થયા.
સહુ બહાર નિકળ્યા ત્યાંતો બીજી તરફના બારણેથી લગભગ ૩૦૦
જેટલા ગરીબ બાળકો અંદર ધસી આવી સહુના એંઠા ભાણા પર ટૂટી પડ્યા. બે
મિનિટ પછી વરંડા બાજુના બારણા ખૂલ્યા. ભય સૂચક ઘંટ બંધ થયો હતો. બારણું
ખુલતાની સાથે અંદરનું દૃશ્ય જોઈ મહેમાનોની આંખો પહોળી થઈ ગઈ.
મિનિસ્ટરનો માઈક ઉપરથી અવાજ સંભળાયો. આમંત્રિત મહેમાનો, જે જોઈ
રહ્યા છે તે સત્ય છે. મારી વિનવણીથી આ નાટક કરવામાં આવ્યું હતું. યાદ રહે આપણા
“ભારતના ગરીબ વર્ગનો જઠરાગ્નિ” જે દિવસે જાગશે ત્યારે ખંડેરની ભસ્મ કણી ન લાધશે.
સમજો તો સારું નહીતર પરિણામ માટે તૈયારી રાખજો. આ તો માત્ર ઝલક છે.
એ હતા આપણા લાંચરુશ્વતથી અળગા રહેનારા મિનિસ્ટર————————-
જીંદગીનું નગ્ન સત્ય
July 13th, 2010જો જીવનમાં કાંઈ ન હોય ત્યારે અભાવ નડે
થોડુ ઘણું હોય ત્યારે મોંઘા દાટ ભાવ નડે
જીવનનું નગ્ન સત્ય છે કે ઈશ્વર કૃપાએ બધું હોય
ત્યારે સ્વભાવ નડે.
અને જ્યારે કાંઇ ન નડે ત્યારે વગર કારણે કોઈના
પ્રત્યે ક્ભાવ ————-
વાંચો અને વિચારો
July 12th, 2010સ્ત્રીની સહુથી મોટું દુશ્મન જો કોઈ પણ હોય તો તે સ્ત્રી છે.
તો સ્ત્રીનૉ સહુથી સારો મિત્ર કોણ ?
સ્ત્રી જ સ્ત્રીને નથી સમજી શકતી તેમાં વાંક કોનો ?
સ્વાર્થના ચશ્માનો.